Jólasögur, jólaglens og jólatré

Heil og sæl.

Af mér er allt gott að frétta.

Jólin eru að nálgast og spenningur liggur í loftinu.  Börnin á leikskólanum koma með dót sem það hefur fengið frá jólasveininum og ein fékk kartöflu.  Já sveinki hafði ruglast eitthvað, amma átti að fá hana hún býr á næsta bæ. 

Gleðin og eftirvæntingin skín úr augum barnana.  Við gengum uppí Sauraskóg og hituðum kakó og grilluðum brauð.  Stúfur kom og hann var mjög stór, hann borðar víst alltaf grautinn sinn.

Mikið er nú gaman að upplifa þetta með börnunum. Syngja, föndra, baka piparkökur, búa til skraut á jólatré leikskólans og helgileikur elstu barna og jólaball. 

Já ég man þau jól....

Það var í kringum 1965 eða 1966 

Steini bróðir mömmu vann á skipi sem silgdi út um allan heim.  Hann kom með jólakjólana, kápur, sokka og skó og svo auðvitað epli, appelsínur og niðursoðna ávexti já og útlenskt nammi.

Allt var þetta geymt í geymslu með lás, já mamma setti lás á kuldakompuna. Kökubox voru límd aftur og merkt. Góðgætinu var fagmannlega raðað í hillurna.  Þegar kom að því að fá epli eða appelsínur skar mamma þau í fullkomna báta og skipti jafnt svo enginn færi að rífast. Ilmurinn af jólaeplunum fyllti kjallarann.  Stundum fékk ég appelsínu með gati og sykurmola ofan í

Mamma vann sjónvarp í Bingói sem Svavar Gests stjórnaði og kom hún með það heim í leigubíl sem var afar sjaldgæft.  Normende svart/hvítt í fallegum viðarkassa.   Kanasjónvarpið af vellinum náðist og þessi jól voru himnesk.

Nema hvað,  eftir jólin fór mamma niður og ætlaði að taka til og ganga frá jólaskrautinu í kompunni góðu , sé ég þá ávaxtarkarmellu á gólfinu sem var alveg eins og þær sem sveinki  hafði gefið mér í skóinn. Mamma sérðu nammi eins og sveinki var með.  já hann hefur troðist hérna í gegn eina nóttina og misst þetta.  Ha, í gegnum geymsluna með lásnum já og út um gluggann sem var svona  30X30 kjallarakompugluggi.  já undarlegur þessi sveinki.

Yndisleg minning og skemmtileg.

Haltu varlega á hamingjunni í hendi þér.  Þú hefur hana aðeins að láni.

Lifið lífinu lifandi og ekki láta jólastressið þjaka ykkur,

Jólakveðjur,   Jólatré 2006  hvernig verður jólatré 2007?

Jólakveðjur eru vel þegnar, þær lífga svo upp á skammdegið

 

 

 

Athugasemdir

[Ása Hildur Guðjónsdóttir, 19.12.2007 kl. 23:41]

Takk fyrir góðan pistil.

Gleðilega hátíð og njóttu lífsins.

[Hrönn Sigurðardóttir, 20.12.2007 kl. 16:26]

Alltaf gaman að lesa um minningar fólks! Takk fyrir að deila þessari minningu með okkur.

Gleðileg jól og hafðu það gott um hátíðina.

[Margrét St Hafsteinsdóttir, 22.12.2007 kl. 22:06]

Gleðileg jól og hafðu það sem allra best   

[Vilborg Traustadóttir, 23.12.2007 kl. 22:47]

Skemmtileg minning.  Gaman að lesa um þetta.  Jólasveinar og kartöflur,skil ekki alveg hvað er svona mikil refsing að fá kartöflu?  Hollar og góðar!  Einu sinni fengu synir mínir bjúgu í skóinn og daginn eftir var veisla.  (Ég átti kartöflur með bjúgunum).......