Gleðilegt nýtt ár Átaksvinir nær og fjær

Heil og sæl og hugheilar nýárskveðjur.

     Já auðvitað gerði ég áramótaheit.  Reyna eftir bestu getu að vera skemmtilegri persóna, vera jákvæðari og reyna að dreyfa gleði í kringum mig.

Já og auðvita tekst þetta því þetta er auðvelt að uppfylla en að missa nokkur kíló fuss og svei.

Ég hætti að reykja 1.apríl 2007 (og það var ekki apríl gabb )og hef staðið mig eins og hetja.  Ekki einu sinni langað í smók. Nema hvað, til að byrja með fitnaði ég ekki en núna blæs ég út og má bara ekki við því frekar en hvað annað.

Sem sagt ég ætla að fara í átak eins og þorri þjóðarinnar.

Hana, nú er það opinbert. Nú verður ekki aftur snúið. Hjúkk. en hvenær ég byrja veit ég ekki hahaaha auðvitað eins og sá lati er ég algjör fíkill og mjög vond við sjálfa mig og neyti óhollustu eins og mér væri borgað fyrir það, en það er nú ekki.   Svo tímir maður ekki að borga öðrum fyrir að láta mann djöflast eins og hálfvita á hlaupabretti og stigvélum ooooo þetta er ferlegt..

Jæja verð hálf þunglynd af þessari hugsun og ætla að skipta um gír og tala um allt annað.

Leikfélagið Grímnir í Stykkishólmi stefnir á suðurferð 18,19 og 20 janúar og sýna söngleikinn Oliver í leikhúsi Mosfellsbæjar.  Um 60 manns fara suður og þetta er ekkert smá uppátæki að taka upp þráðinn þar sem frá var horfið í nóvember sl.  Skipulag og aftur skipulag.  Leikæfing verður á morgun kl 14:00.  http://stykk.is/grimnir

Læt þetta duga að sinni, hvet fólk til að hvitta í gestabókina mína.

Góða nótt,

 

Jólasögur, jólaglens og jólatré

Heil og sæl.

Af mér er allt gott að frétta.

Jólin eru að nálgast og spenningur liggur í loftinu.  Börnin á leikskólanum koma með dót sem það hefur fengið frá jólasveininum og ein fékk kartöflu.  Já sveinki hafði ruglast eitthvað, amma átti að fá hana hún býr á næsta bæ. 

Gleðin og eftirvæntingin skín úr augum barnana.  Við gengum uppí Sauraskóg og hituðum kakó og grilluðum brauð.  Stúfur kom og hann var mjög stór, hann borðar víst alltaf grautinn sinn.

Mikið er nú gaman að upplifa þetta með börnunum. Syngja, föndra, baka piparkökur, búa til skraut á jólatré leikskólans og helgileikur elstu barna og jólaball. 

Já ég man þau jól....

Það var í kringum 1965 eða 1966 

Steini bróðir mömmu vann á skipi sem silgdi út um allan heim.  Hann kom með jólakjólana, kápur, sokka og skó og svo auðvitað epli, appelsínur og niðursoðna ávexti já og útlenskt nammi.

Allt var þetta geymt í geymslu með lás, já mamma setti lás á kuldakompuna. Kökubox voru límd aftur og merkt. Góðgætinu var fagmannlega raðað í hillurna.  Þegar kom að því að fá epli eða appelsínur skar mamma þau í fullkomna báta og skipti jafnt svo enginn færi að rífast. Ilmurinn af jólaeplunum fyllti kjallarann.  Stundum fékk ég appelsínu með gati og sykurmola ofan í

Mamma vann sjónvarp í Bingói sem Svavar Gests stjórnaði og kom hún með það heim í leigubíl sem var afar sjaldgæft.  Normende svart/hvítt í fallegum viðarkassa.   Kanasjónvarpið af vellinum náðist og þessi jól voru himnesk.

Nema hvað,  eftir jólin fór mamma niður og ætlaði að taka til og ganga frá jólaskrautinu í kompunni góðu , sé ég þá ávaxtarkarmellu á gólfinu sem var alveg eins og þær sem sveinki  hafði gefið mér í skóinn. Mamma sérðu nammi eins og sveinki var með.  já hann hefur troðist hérna í gegn eina nóttina og misst þetta.  Ha, í gegnum geymsluna með lásnum já og út um gluggann sem var svona  30X30 kjallarakompugluggi.  já undarlegur þessi sveinki.

Yndisleg minning og skemmtileg.

Haltu varlega á hamingjunni í hendi þér.  Þú hefur hana aðeins að láni.

Lifið lífinu lifandi og ekki láta jólastressið þjaka ykkur,

Jólakveðjur,   Jólatré 2006  hvernig verður jólatré 2007?

Jólakveðjur eru vel þegnar, þær lífga svo upp á skammdegið

 

 

 

Söngleikurinn Oliver aðsóknarmet í Stykkishólmi og ég afmælisbarn

Heil og sæl.

Af mér er allt gott að frétta.  Ég á afmæli í dag 12.nóv,  48 ára , en hvað er það svo sem ?.  Ég er svo ung í anda að það hálfa væri nóg, alltaf, hálfgert trippi, skotta já eða dúlla.  Afmæliskveðjur vel þegnar, enda er ég mikið fyrirsvoleiðis, já og pakka fyrir þá sem það vilja...........Fékk einn frá Gunna  bróður, Gunni ég gat ekki beðið til morguns með að opna hann,  takk frábær gjöf.

 

 

Leiksýningar ganga bara vel, og hefur aðsókn verið meiri  en á fyrri sýningu félagsins.  Um 400 manns hafa séð Oliver og má búast við öðru eins ef ekki meti, kannski 1000 manns, það væri snilld.  Okkur langar að fara með  leikritið til Reykjavíkur til að leyfa öllum aðstandendum  sem ekki komast vestur að sjá og einnig hinum sem vilja endilega koma og sjá öfluga söngleikjasýningu.

Ég ætla að setja nýjar myndir í leikhús-albúmið

Jæja, kominn háttatími.  Guð geymi ykkur

kveðja,

Formaður á harða spani Söngleikurinn Oliver, leikskrá........

Heil og sæl.

Mikið er ég glöð  að eiga smá blog tíma fyrir aðdáendur leiklistar.  Undirbúningur er á lokastigi enda frumsýning á föstudagskvöld.   Flosi Ólafson sem er þýðandi verksins sá sér ekki fært að koma með Lilju sína á frumsýningu, var búin að ráðstafa sér annað enda vinsæll maður pantaður með mörgum vikum fyrirfram.

Sendi öllum þeim sem hafa átt í netsambandi við mig út af auglýsingum vegna Olivers, Stykkishólmspósturinn/Anok Skessuhorn, Prentmet, Steinprent,  Jóhannes, Ólafur,  Davíð , og svo að lokum Anna , Hafdís og Hrafnhildur já og Þorgrímur fyrrverandi formaður fyrir austan.innilegar kveðjur með þökk fyrir ómetanlegan stuðning og aðstoð,  gaman að kynnast nýju fólki sem maður veit ekki hvernig lítur út.  Samt finnst mér best að tala í síma en þannig kynntist ég manninum mínum en það er önnur saga.

Er að fara hitta ljósmyndara Skessuhornsins.....

Bið ykkur vel að lifa,  http://stykk.is/grimnir

 

formaðurinn,

 

Fjölmenningarhús í Stykkishólmi????

Heil og sæl,

Já, hvernig finnst ykkur orðið fjölmenningarhús?

Hús fyrir ýmislegt menningarlegt?

Fyrir leikfélagið?                              

Fyrir félagsmiðstöð unga fólksins?

Fyrir hljómsveitaræfingar?

Fyrir kóra bæjarfélagsins?

Fyrir starfsemi félagasamtaka?

Fyrir árshátíðir og þorrablót bæjarbúa?

Fyrir myndlistarsýningar?                     

Fyrir fyrirrlestra og sýningar.? 

Hvað er það sem svona hús þarf að hafa?

Svið-sal-herbergi-fatageymslur-eldhús-búningsherbergi-ljóskastara-herbergi fyrir hljóð og músik dj-wc-kjallara eða jarðhæð fyrir félagaherbergi þar sem hver á sitt-geymslur fyrir leikmyndir og fl ogfl...

Bjartar vistaverur, vel einangraðar, þar sem öllum líður vel?

Hver vill fjármagna svona fyrirbæri fyrir Stykkishólm???????

Hvet fólk til umhugsunar, þetta er mér hjartans mál.

(vegna lélegrar aðstöðu leikfélagsins Grímnis)

Oliver,Oliver Stykkishólmi 2 nóvember

Heil og sæl.

Er veik heima eins og í vor en ekki eins slæmt tilfelli.

Nú um helgina síðustu voru fimir fingur sem smíðuð leikmyndir fyrir Oliver sem á að frumsýna þann 2 nóv samkvæmt plani.

Líkkistur, stigar, pallar og ýmisleg annað. Þakkir til Þorgríms, Svenna, Arnars, Daníels og Pálma. Einnig fær Skipavík þakkir fyrir að lána leikfélaginu aðstöðu. Formaðurinn tekur sig vígalega út vopnuð borvélum. ha ekki satt??

Þar sem Stykkishólmur á ekkert FÉLAGSHEIMILI eða LEIKHÚS kemur það niður á starfsemi leikfélagsins.  Ræðum það síðar.... viðkvæmt mál

Nýr eigandi hefur keypt Hótel Stykkishólm og vonandi eigum við eftir að eiga gott samstarf  um notkun á veislusalnum. ( áður Félagsheimilið )

Jæja bóndinn þarf að komast í tölvuna til að læra,

kveð að sinni,

Leikfélagið Grimnir í Stykkishólmi og heyrnartæki

Heil og sæl.

Já, loksins er mín heima til að blogga.

Sitthvað er nú búið að ganga á hjá mér, mest skemmtilegir hlutir.

Til að byrja með eignaðist ég heyrnartæki í bæði eyru. Já heyrði alltaf illa, misskildi alla og gat varla haldist á balli.

Heyrnin á vinstra eyra var verra en það hægra.  Er núna með þessi nýju og fínu tæki og lífið er yndislegt.

 

Á aðalfundi leikfélagsins var ég kosin formaður Grímnis og erum við að setja upp leikritið Oliver.  Guðjón Sigvaldason er að leikstýra, mikið stuð.  Þannig að ef ég er ekki í vinnunni þá er ég uppá  hóteli að gefa leikurum djús, kex og ávexti. 

Er með smá texta í leikritinu, leik Frú Bedwin góðu konuna. Guðjóni fannst það passa mér þar sem ég er mamma leikfélagsins.

 

www.stykk.is/grimnir

 

 

Er að fara að sofa,dreyma eitthvað skemmtilegt. Vonandi get ég bloggað meira seinna.

Bið að heilsa eftir Inga T

Góða nótt og sofið rótt. kveðja

 

Busun og bbbuuuuuussssunnnnn

Ja hérna, 

þegar ég var busuð í Ármúlaskóla 1977 var manni dýft í slorbað og ég kúast við tilhugsunina.  Seinna fengum við rós. Sumir reyndu að fela sig á klósettum til að losna við gumsið. Það var ógeð að fara heim með strætó, leið 11 upp Grensásveginn,  fílan og erfitt að ná slorinu úr hárinu.

Kveðja, ein busuð

Skólameistari MÍ segir busun hafa farið úr böndunum

Danskir dagar og Danmerkurferð

Heil og sæl,

Hvad siger du? 

Já, mín er búin að vera annsi upptekin við eitt og annað.

Fyrst voru danskir dagar í Stykkishólmi.  Mikil gleði og mikið grín.  Fór á fína hjólinu mínu og seldi heitt súkkulaði og Lion bar súkkulaði fyrir Lionsklúbbinn Hörpu.Já rautt skal það vera á dönskum dögum. 

Frábær helgi og fallegt veður.

 

Nú svo fór mín til Danmerkur með 10 bekk GSS Grunnskóla Stykkishólms til vinabæjar okkar Kolding.  Skemmtilegir dagar, fórum í Legoland og Danfoss universe á Als eyju  Frábært safn og vert að skoða.

Krakkarnir voru að vinna að verkefni um Danfoss hitastýri-tæki, þrýstijafnara og annað.  Unnu síðan að gerð heimasíðu.  Enduðum í Kaupmannahöfn í 2 daga, rok og rigning í Tívolíi en samt mjög skemmtilegt.  Komum heil heim á laugardag, allir glaðir og kátir eftir viku útiveru.

Jæja nú er tími til að blogga.  Bóndinn farinn að Hólum í fiskeldis námið og kemur eftir viku.  Heyrði í honum áðan og þetta leggst bara vel í hann. 

Læt þetta duga, er enn í danska tímanum, verð að fara að sofa. 

Góða nótt og sofið vært,,,,,,

Draum-stautar

Heil og sæl.

Vaknaði eldhress að venju fór fram úr  og vatt mér í flókaskóna góðu.

Frábær hugmynd sem ég fékk í morgunsárið eða mig dreymdi það. Úfff man ekki hver hún var en hún var frábær.  Ferlegt þegar gráu sellurnar eru ekki að standa sig.

Já man núna,  væri ekki frábært að dreyfa skatthæstu einstaklingunum á sveitafélögin til að efla innkomu þeirra? ha já með lögheimili hér en búi í Rvk eða hvar sem er. 

Til dæmis gæti gæti Hreiðar Már Sigurðsson tilheyrt Stykkishólmi, ha hann er nú hólmari nú og hinir og þessir tilheyrt öðrum stöðum t.d. Hannes Þór skráist á Ísafjörð, á staði sem  þurfa aðstoð eftir aflabrest eða að kvótinn hefur verið seldur burt. 

Já en hvernig þetta væri framkvæmanlegt, það er ég ekki búin að hugsa, kemur kannski með næsta draum. Allaveg væri þetta fólk vinsælt hjá bæjarbúum.

Bíð eftir næsta draum, vonandi virkar draum-stauturinn.

Legg mig núna, meira að frétta í kvöld. 

Kveðja,